Прослава по повод Јубилејот - 60 години од формирањето на НУ Конзерваторски центар Скопје

На 6. Ноември 2023 година, НУ Конзерваторски центар – Скопје го одбележа својот јубилеј 60 години од основањето, со прослава која беше приредена во атриумскиот простор на комплексот „Св. Спас“, Скопје. Имавме чест и задоволство да прославиме со нашите искрени и долгогодишни пријатели и соработници, во една достоинствена, спонтана, релаксирана и пријатна - достојна на настанот атмосфера, притоа уживајќи во прекрасниот автентичен амбиент... Особено задоволство претставува фактот што меѓу гостите беа наши поранешни колеги, како и поранешни директори на институцијата, а со своето присуство значаен впечаток оставија големиот број истакнати творци во полето на уметноста и културата. Во оваа прилика, на дел од нив им беа врачени Благодарници за соработката со НУ Конзерваторски центар Скопје. Би сакале да го изразиме и задоволството што меѓу гостите беше и министерката за култура, г-ѓата Бисера Костадиновска Стојчевска со членови од својот Кабинет. На сите вработени кои несебично земаа учество во подготовките и допринесоа за свеченото и достоинствено одбележување на јубилејот, сакаме да им изразиме голема благодарност. Во таа смисла, би сакале да истакнеме дека визуелниот идентитет на настанот беше дело на м-р Нита Муча, конзерватор, вработена во НУ Конзерваторски центар Скопје, додека за музичкиот идентитет на настанот придонесоа музичките уметници Мирко Попов и Тони Зен со свои ДЈ-сетови... Конзерваторски центар - Скопје им се заблагодарува на сите свои вработени кои секојдневно, несебично работат на програмските и вонпрограмските активности притоа давајќи свој личен придонес во заштитата на културното наследство.